ქონების გადასახადით დასაბეგრი ბაზა გაფართოვდა - 2016 წლის 1 იანვრიდან ქონების გადასახადით საწარმოს ბალანსზე აღრიცხული საინვესტიციო ქონებაც იბეგრება.
საინვესტიციო ქონების განმარტებას იძლევა ფინანსური აღრიცხვის საერთაშორისო სტანდარტების მე-40 სტანდარტი, რომლის მიხედვითაც საინვესტიციო ქონება არის ქონება ( მიწა ან შენობები, ან შენობების ნაწილი, ან ორივე), რომელსაც ფლობენ ( მესაკუთრე ან მოიჯარე ფინანსური იჯარის პირობებში) საიჯარო შემოსავლის მიღების ან კაპიტალის ღირებულების გაზრდის მიზნით, გარდა ისეთი მიზნებისა, როგორიცაა:
ა. გამოყენება საქონლის წარმოების ან მიწოდების, მომსახურების გაწევის ან ადმინისტრაციული მიზნებისთვის.
ბ. გაყიდვა ჩვეულებრივი საქმიანობის პირობებში.
საინვესტიციო ქონება აქტივად უნდა აღიარდეს, მხოლოდ მაშინ, როდესაც:
ა. მოსალოდნელია, რომ საწარმო მიიღებს ამ ქონებასთან დაკავშირებულ მომავალ ეკონომიკურ სარგებელს.
ბ. შესაძლებელია საინვესტიციო ქონების თვითღირებულების საიმედოდ შეფასება.
